सांगली: – पाणलोट क्षेत्रात जोरदार पाऊस झाल्यामुळे कोयना आणि वारणा धरणांमधून पाण्याचा विसर्ग वाढवण्यात आला आहे. यामुळे सांगलीतील कृष्णा नदीच्या पाणी पातळीत सातत्याने वाढ होत आहे. या संभाव्य पूरस्थितीला तोंड देण्यासाठी जिल्हा प्रशासन सज्ज झाले असून, जिल्हाधिकारी अशोक काकडे यांनी नागरिकांना प्रशासनाकडून दिल्या जाणाऱ्या सूचनांचे पालन करण्याचे आवाहन केले आहे. तसेच, नागरिकांनी कोणतीही अफवांवर विश्वास ठेवू नये आणि सुरक्षित ठिकाणी स्थलांतरित व्हावे, असेही त्यांनी सांगितले.
पूरस्थितीची तयारी आणि नागरिकांना सूचना
जिल्हाधिकारी अशोक काकडे म्हणाले, संभाव्य पूरस्थितीमध्ये नागरिकांनी किंवा तरुणांनी नदीच्या पाण्यात कोणतेही धाडस करू नये. पाण्याचा अंदाज घेण्यासाठी किंवा पाहण्यासाठी गर्दी करू नये. प्रसारमाध्यमांनीही बातम्या देताना अनावश्यक भीतीचे वातावरण निर्माण होणार नाही याची काळजी घ्यावी, असे आवाहन त्यांनी केले.
जिल्हा प्रशासन आणि जिल्हा आपत्ती व्यवस्थापन कक्ष सर्व संबंधित यंत्रणांच्या आणि नियंत्रण कक्षाच्या नियमित संपर्कात आहे. नागरिकांनी मागील पुराच्या अनुभवावरून पूर्वतयारी करावी, असे जिल्हाधिकाऱ्यांनी सांगितले.
मदतीसाठी संपर्क क्रमांक
नागरिकांच्या मदतीसाठी खालील संपर्क क्रमांक उपलब्ध आहेत:
* आपत्ती व्यवस्थापन टोल फ्री क्रमांक: १०७७
* जिल्हा आपत्ती व्यवस्थापन नियंत्रण कक्ष: ०२३३-२६००५००
* जलसंपदा विभाग नियंत्रण कक्ष (२४x७): ०२३३-२३०१८२० आणि ०२३३-२३०२९२५
* महानगरपालिका मदत कार्य: ७०६६०४०३३०, ७०६६०४०३३१, ७०६६०४०३३२
अधिक माहितीसाठी नागरिकांनी या नियंत्रण कक्षांशी संपर्क साधावा, असे जिल्हाधिकारी अशोक काकडे यांनी स्पष्ट केले.
